آذربایجان

قیزلدان اولسا قفسیم آزادلیقا وار هوسیم

آلپ ارسلان

0 گؤروش
یازار:‌ سمیرا

بؤیوک سلجوق‌لو دؤولتی‌نین عدالت‌لی حؤکمداری‌، قابیلیت‌لی قوموتانی و مشهور مالازگیرد ساواشی‌نین قالیبی سلطان آلپ‌آرسلان!


سئوگیلی اوخوجولار!
بؤیوک سلجوق‌لو دؤولتی‌نین عدالت‌لی حؤکمداری‌، قابیلیت‌لی قوموتانی و مشهور مالازگیرد ساواشی‌نین قالیبی سلطان آلپ‌آرسلان!
تاریخ بویونجا چئشیدلی سبب‌لردن اؤترو فرق‌لی جغرافیا‌لارا کؤچ ائدیب اورا‌لاردا اؤزونه خاص حیات طرزیله یئنی بیر دوزن قوران تورک‌لر، ایسلام دینینی قبول ائتدیک‌دن سونرا دا بؤیوک کوتله‌لر حالیندا دوغو‌دان باتییا کؤچ ائتمه‌یه باشلادی‌لار. اکثریتی اوغوزلاردان، دیگر قیسمی ایسه اویغورلار و قیپچاق‌لاردان اولوشان تورک بوی‌لاری، گلدیک‌لری یئنی جغرافیا‌لاردا اؤز مدنیت و حیات فلسفه‌لرینی اؤزگورجه داوام ائتدیره‌بیلمه‌لری و طبیعی قایناق‌لار باخیمین‌دان داها زنگین اولان بؤلگه‌لره گئده‌بیلمک اوچون، اؤز دؤولت‌لرینی قورما احتیاجی دویمایا باشلادی‌لار. اورتادوغونون بؤیوک بیر قیسیمینی احاطه ائدن، خوراسان‌دان مصره، ایران‌دان آنادولویا قدر اوزانان گئنیش بیر جغرافیانی قابسایان سلجوق‌لو امپراتورلوغو دا بئله بیر احتیاجدان اورتایا چیخدی.
سلجوق‌لولارین دؤولت قورماق‌دان مقصدی یالنیز یئنی جغرافیا‌لاردا اؤزونو ضمانت آلتینا آلماق و یا یئنی تورپاق‌لار فتح ائتمک دئییلدی. اونلار عینی زاماندا بیلیم و صنعته وئردیک‌لری اؤنمله، ایزلری گونوموزه قدر سورن مین‌لرجه اثر میراث بوراخمیش‌لار. بیربیرین‌دن گؤزل معمارلیق اثرلری، تاریخی آنید‌لار و صنعت اثرلری، سلجوق‌لو دؤولتی‌نین میراثی اولا‌راق سونراکی نسیل‌لره امانت ائدیلمیش‌دیر.
گئچیش
سلطان آلپ آرسلان، سلجوق‌لو دؤولتی‌نین ایکینجی سلطانی‌دیر. آنجاق تورک‌لرین آنادولویا گیریشینی ساغلایان باشاری‌لی بیر قوموتان و قابیلیت‌لی بیر دؤولت آدامی اولدوغون‌دان تورک سیاسی تاریخینده اولدوقجا اؤنم‌لی بیر یئره صاحب‌دیر.
سلطان آلپ آرسلان 20 ژانویه 1029 تاریخینده دوغولدو. آتاسی چاغری‌بی‌ین یانیندا ائییتیم آلدی، ساواش تکنیکلرینی اوندان اؤیرندی. آتاسییلا بیرلیکده قاتیلدیغی ساواش‌لارین خاریجینده، گنج یاشدا بئله بیر چوخ ساواشدا اوردونون قوموتانلیغینی اوستلندی، ظفرلر قازاندی. اؤنجه خوراسانا ولیعهد تعیین ائدیلمیش اولان آلپ آرسلان، آتاسی چاغری‌بی‌ین اؤلومون‌دن سونرا 1060دا اونون یئرینه گئچه‌رک خوراسان والی‌سی اولدو. تخمینا اوچ ایل سونرا، 7 دسامبر 1063 تاریخینده عمی‌سی، سلجوق‌لو دؤولتی‌نین سلطانی توغرول‌بی وفات ائدینجه‌، سلجوق‌لو بی‌لری طرفین‌دن تاختا چیخاریلان آلپ آرسلان‌، 27 آوریل 1064ده بؤیوک بیر مراسیمله سلطان‌لیغینی رسمی اولا‌راق اعلان ائتدی. آنجاق بو حادثه چوخ دا آسان اولمادی. چونکو اوغلو اولمایان توغرول‌بی‌، قارداشی چاغری‌بی‌ین اوغوللاریندان‌ سلیمانین تاختا چیخماسینی ایسته‌میشدی. بونا گؤره‌، ایرانین بو گونکو باشکندی تهرانین گونئیینده اولان ری شهرینده سلیمان سلطان اعلان ائدیلدی. آنجاق آلپ آرسلان و خانداندان بعضیلری اونون سلطان‌لیغینی تانیمادی‌لار . نهایت بؤیوک بیر ایختیلافین آردین‌دان آلپ آرسلان ری شهرینده تاختا چیخمایی باجاردی.
سلطان آلپ آرسلان ایلک ایش اولا‌راق عمی‌سی توغرول‌بی‌ین وزیرلیگینی ائدن عمیدالملکو عزل ائدیپ یئرینه نیظام‌الملکو اؤزونه وزیر تعیین ائتدی. داها سونرا اؤلکه‌نین چئشیدلی بولگه‌لرینده، اؤزللیکله ده خاندانا منسوب شخص‌لر طرفین‌دن چیخان عصیان‌لاری باشاریلا باسدیران آلپ آرسلان، هم باتیدا، هم ده دوغودا ساواش‌لار باشلاتدی. بیر طرف‌دن گورجوستانی فتح ائتدی، اؤته یان‌دان دا جیحون چایینی گئچه‌رک، او بؤلگه‌دکی حؤکمدارلا آنلاشما باغلادی.
عصیان‌لاری باسدیریب آنلاشما‌لار ائده‌رک دؤولتینی گئنیشله‌دن آلپ آرسلان، بیر طرف‌دن ده ان بؤیوک رقیبی اولان بیزانس امپراتورلوغونو دا یاخین‌دان تعقیب ائدیردی. بعضی سلجوق‌لو بی‌لری‌نین آنادولویا گیریب بیر چوخ ظفر قازانماسی اوزرینه، بیزانس امپراتورو رومانوس دیوژنیس بؤیوک بیر اوردویلا سلجوق‌لو دؤولتینه قارشی سفر باشلاتدی. آنجاق مالاتیادا تورک عسگرلرین‌دن آلدیغی بؤیوک ضربیله گئری دؤنمک مجبوریتینده قالدی. آلپ آرسلان 1070ده آذربایجانی فتح ائتدی. آردین‌دان وان گؤلونون قوزئیین‌دن گئچه‌رک مالازگیرده گلدی. اورفانی محاصره‌یه آلدی و 1071ده اوردونو حلبده توپلایاراق مصر سفرینه چیخماغا قرار وئردی. آنجاق بو خبری اؤیرنن بیزانس امپراتورو سلجوق‌لولارا قارشی بؤیوک بیر هوجوم اوچون حاضرلیق‌لارینی تاماملادی. روم ائلی‌ده یاشایان تورک‌لری ده اوردوسونا قاتان بیزانس، 13 مارس 1071 تاریخینده تخمینا 200 مین عسگرله ایستانبول‌دان یولا چیخدی و نهایت مالازگیرده گلدی. بو آرادا هوجوم خبرینی ائشیدن آلپ آرسلان، مصر سفرین‌دن وازگئچرک مالازگیرده دوغرو حرکت ائتدی. سلطان آلپ آرسلان بیتلیسه چاتدیغیندا اون مین عسگری آییریب آخلاطا گؤندردی و بیزانسلا چاتیشما یاشاندی. بو وضعیته قیزان دیوژنیس، مالازگیرد قالاسینا سالدیراراق بیر چوخ انسانی قتل ائتدی. نهایت آلپ آرسلان و دیوژنیس اوردولاری مالازگیرد دوزلوگونده قارشی قارشییا گلدی‌لر . آلپ آرسلانین ساواشا باشلاما‌دان اؤنجه آتین‌دان ائنه‌رک دعا ائتدیگی و عسگرلرینه خیطاب اولا‌راق هیجان‌لی بیر چیخیش ائتدیگی دئییلیر‌. آلپ آرسلان سایجا اؤزون‌دن چوخ اوستون اولان بیزانس اوردوسونا قارشی اسکی تورک‌لرین ایستیفاده ائتدیگی آیپارا تاکتیگیله بؤیوک ظفر قازاندی، دوشمن اوردوسونو داغیدا‌راق ایمپراتور رومانوسو اسیر آلدی. آلپ آرسلان چوخ اصیل بیر داورانیش سرگیله‌یه‌رک بیزانس امپراتورونون جانینی باغیشلادی و اونا ایللیک وئرگی باغلاماقلا کیفایتلندی. بئله‌جه آلپ آرسلان دوغونون و باتینین ان بؤیوک حؤکمدارلاریندان‌ بیری اولا‌راق تاریخه گئچدی.
سلطان آلپ آرسلان 1072ده بیر قاراخان‌لی قالا کوموتانی طرفین‌دن اؤلدورولدو. سون آراشدیرما‌لارا گؤره، مزاری مرو شهرینده‌دیر.

آردینی اوخو
دوشنبه 20 بهمن 1393

پروفسور دکتر جواد هیئت

0 گؤروش
یازار:‌ سمیرا

سئوگی‌لی اوخوجولار،

چوخ اسکی‌دن "حکیم" سؤزو بیر نئچه بوداقدا متخصص اولان، چوخ اؤلچولو شخصیته صاحب اولان علم آدام‌لاری اوچون ایستیفاده ائدی‌لردی. ابن سینا و فارابی کیمی شخصیت‌لره "حکیم" دئیی‌لردی. ایندیکی زاماندا ایسه، "حکیم" سؤزو داها چوخ "طیب"، یعنی طیب دوکتورو معناسیندا ایستیفاده ائدی‌لر. بونا گؤره بو گونکی پروقرامیمیزدا دا، هر ایکی معنادا "حکیم" اولان، هم طیب، هم ده بشری علم‌لر ساحه‌سینده بیر چوخ قانون ایمضا آتان پروفسور دوکتور جواد هیئت


جواد هیات 1925-جی ایلده تبریزده حؤرمت‌لی بیر عائله‌دن دوغولدو. دین، فلسفه و آسترونومی متخصصی اولان آتاسی علی هیئت، ایران مشروطه اینقیلابی‌نین لیدرلرین‌دن، عدلیه ناظیری و عالی محکمه اورقانی باشقانی ایدی. آتاسی‌نین ایشین‌دن اؤتری ایبتیداعی مکتب، اورتا مکتب و دبیرستان تحصیلی فرق‌لی شهرلرده تاماملایان جواد هیئت، 1941-جی ایلده تهران اونیورسیته‌سی طیب فاکولته‌سینی قازاندی. اورادا اوچ ایل تحصیل آلدیق‌دان سونرا، ایران‌دان تورکیه‌یه گؤندریلن ایلک شاگیرد قروپو ایله بیرلیکده ایستانبولا گلیب 1946-جی ایلده طیب علم‌لری دوکتورو اولدو. ایستانبولدا آیریجا اوچ ایل ایختیصاص تحصیلی آلان جواد هیئت، ایختیصاصینی تاماملاماق اوچون اوچ ایل ده پاریسه گئتدی و 1952-جی ایلده تهرانا دؤندو. مقصدی اینسان‌لارا خیدمت اولان گنج جراح جواد هیئت، دؤورون محدود ایمکان‌لارینا باخمایا‌راق، جراحی عمل‌لره باشلادی. گنل جراحیله بیرلیکده اوره‌ک عمل‌لرینی د ائدن هیئت، 1967-جی ایلده ایراندا ایلک آچیق قلب عملیاتینی باشاریله رئاللاشدیردی. آردین‌دان اوره ک قاپاغینی دییشدیرمه و تهراندا ایلک دفعه بیؤرک نقلی عمل‌لرینی باشاریله حیاتا کئچیره‌رک، دونیادا بؤیوک شؤهرت قازاندی.

جراحی عمل‌لرله بیرلیکده علمی آراشدیرما‌لارینی دا داوام ائتدیرن دوکتور جواد هیات، 12 ایل بویونجا "طیب علمی" ژورنالیندا نشر ائتدی. اولوسلار آراسی طیب قورولتای‌لاریندا، دونیا طیب علمینه یئنی‌لیک‌لر گتیرن اونلارلا بیانات تقدیم ائتدی. 1963-جو ایلده دونیا جرراه‌لار توپلومی و 1983-جی ایلده ایسه فرانسا جراحی آکادئمیسینه عضو سئچیلدی و 1988-جی ایلدن اعتباراً ایللرجه جراحی پروفسور کیمی اونیورسیته ده چالیشدی.

--------

پروفسور دوکتور جواد هیئت‌ین ایراندا تحصیل آلدیغی ایللرده آنا دیلی اولان تورکجه ایران طرفین‌دن قاداغان ائدیلمیش و بو دیلده هر هانسی بیر کیتاب اوخوماق، ساخلاماق و یا اثر چیخارماق بؤیوک بیر گوناه سایی‌لاردی. بونا گؤره ایستانبولا گئدرکن، آتاسی اونا بئله بیر توصیه ائتمیشدی: "اوغلوم من سنی تک طیب اولماق اوچون دئییل، عینی زاماندا دیلیمیزی، مدنیتیمیزی و تاریخیمیزی اؤیرنمک اوچون ایستانبولا گؤندریرم." بو سؤزلر جواد هیئت‌ین ایچین‌دکی اؤیرنمه حیسینی گوجلندیرمیشدی. او یالنیز طیب دئییل، بیر چوخ ساحه‌ده معلومات صاحبی اولما‌لی ایدی.

جواد هیئت تورکیه‌ده طیب شاگیردیکن، فواد کؤپرولو، حمد الله صبحی، محررم ارگین و س. کیمی دؤورون بؤیوک شخصیت‌لری یاخین‌دان تانیش، تورک دیلی، ادبیاتی و تاریخینه دایر کیتاب‌لارلا اؤزونو بو ساحه‌ده ده اینکیشاف ائتدیرر. اصلینده جواد هیئت بون‌لاری اؤیرنرکن، بو معلومات‌لارین نه زامان، هارادا ایشه یارایاجاغینی بیلمیردی. لاکین 1979-جی ایلده ایراندا رئال‌لاشان اینقیلاب نتیجه‌سینده شاه‌لیق رژیمی‌نین ییخیلماسییلا وضعیت بیر آز دییشمه‌یه باشلادی. مشهور جراح جواد هیئت، قول‌لارینی سیوایاراق، ایراندا ایلک دفعه بیر تورکولوژی ژورنا‌لی نشر قرار وئردی. بو ساحه‌ده معلومات صاحبی اولان آراشدیرماچی و ضیا‌لی‌لاری امکداشلیغا چاغیردی. ایراندا تورک‌لرین وارلیغی اینکار ائدیلدیگی اوچون ژورنالا "وارلیق" آدی سئچیلدی. جواد هیئت آرتیق تک بیر طیب دوکتورو دئییل، عینی زاماندا یولداشلارییلا بیرلیکده، خالقی‌نین قاداغان دیلی‌نین و مدنیتی‌نین قورویوجوسو و خیلاصکاری کیمی ده آغیر بیر مسئولیت بوینونا گؤتورموشدو.

زامانلا بیر مکتب، بیر مکتب و غیری رسمی بیر آکادئمی حالینا گلن وارلیق ژورنا‌لی، ایراندا تورک‌لرین بیلینجانمسینا، تورک مدنیتی‌نین یاییلماسیندا و اوزون ایللر قاداغان بیر دیلین یئنی‌دن جانلانماسیندا چوخ اهمیت‌لی بیر رول اوینادی و بئله‌جه، دونیا تورکولوژی علمی‌نین اهمیت‌لی ژورناللاریندان‌ بیری اولا‌راق ادبیاتا کئچدی.

جراحی ساحه‌سینده بیر چوخ اهمیت‌لی قوروما عضو سئچیلن جواد هیئت، تورکولوژی ساحه‌سین‌دکی خیدمت‌لرین‌دن اؤتری بیر چوخ موکافاتا و فخری عنوان‌لارا لاییق گؤرولدو. آذربایجان جمهورسیندا ایستر طیب، ایستر تورکولوژی ساحه‌سینده بیر چوخ اونیورسیته‌سین فخری دوکتورو و پروفسورو عنوانینی آلان جواد هیات، تورکیه‌ده ده تورک دیل تشکیلاتی‌نین فخری عضوودور.

علمی فعالیت‌لری بیرلیکده ایران، تورکیه و آذربایجان آراسیندا دوستلوق کؤرپولری‌نین قورولماسی و مدنی علاقه‌لرین دوغرو بیر مجرادا چوخالماسی اوچون بؤیوک خیدمت‌لری اولان پروفسور دوکتور جواد هیئت، دولت لیدرلری طرفین‌دن ده هر زامان حؤرمتله قارشیلانمیش‌دیر.

آذربایجان-ایران تورک‌لری‌نین معنوی آتاسی، تورک دونیاسی‌نین آغساققا‌لی، زامانین دده قورقودون، تورک دونیاسی‌نین مودریکی کیمی عنوان‌لارلا دا تانینانمیش


آردینی اوخو
پنجشنبه 16 بهمن 1393

محمد فضولی

0 گؤروش
یازار:‌ سمیرا

دیوان ادبیاتی‌نین ان اهمیت‌لی شخصیت‌لریندن، غزل مولکونون سلطانی اولا‌راق بیلینن محمد فضولی حاقیندا دانیشماق ایستییریک بو گونکی پروقرامیمیزدا .
گئرچک آدی محمد بین سلیمان اولان بو بؤیوک شاعرین دوغوم تاریخی تام اولا‌راق بیلینمه‌سه ده، 1480‌لی ایللرده، ایندیکی واختدا عراق سرحدلری ایچینده اولان کربلادا دوغولدوغو تخمین ائدیلمکده‌دیر. اوغوز تورک‌لری‌نین بایات بویون‌دان اولان فضولی، ایلک تحصیلینی آتاسیندان و داها سونرا رحمت الله آدلی بیر معلم‌دن آلمیش‌دیر. دؤورونون اساس علم‌لرینی یاخشی بیر شکیلده اؤیرنن، آنا دیلی اولان تورکجه‌نین بوتون اینجه‌لیک‌لرینی قاورایان، عرب و فارجاسینی دا شعر دیوانی یازابیله‌جک قدر گلیشدیرن فضولی، گنج یاشلاریندان‌ اعتباراً شعر یازماغا باشلامیش‌دیر. اؤزون‌دن اوّلکی بؤیوک شاعرلرین اثرلرینی دفعه‌لرله اوخویوب، بعضن اونلاردان ایلهام‌لانا‌راق قلمه آلدیغی شعرلر، قیسا بیر زاماندا سرحدلری آشا‌راق، شرق جمعیت‌لری آراسیندا یاییلمیش، بیر چوخ شاعره ایلهام قایناغی اولموشدور.
------
فضولی‌نین حیاتی یوخسوللوق و سیخینتی ایچینده کئچمیش و بو وضعیت اونون شعرلرینه ده عکس اولونموش‌دور. او، لیریک و یا عاشیقانه شعرین تورک ادبیاتین‌داکی ان بؤیوک نماینده‌سی‌دیر. لاکین بو قدر مشهور اولماسینا باخمایا‌راق، حیاتی حاقین‌داکی معلوماتیمیز اولدوقجا محدوددور. بیلینن بودور کی، سارای طرفین‌دن سئویلدیگی حالدا، اونلارین حمایه‌سینی قازانا بیلممیش‌دیر. بؤیوک عالیم فواد کؤپرولو، بو وضعیتی اونون عثمانلی‌لاردان فرق‌لی اولا‌راق شیعه مذهبینه منسوب اولدوغونا باغلاییر. لاکین نه وار کی، فضولی، صفوی‌لر طرفین‌دن ده کیفایت قدر دستکلنممیش، حؤرمت گؤرممیش‌دیر. بغدادین عثمانلی دولتی طرفین‌دن اله کئچیریلمه‌سین‌دن سونرا دا گؤزلدیگی ماراغی گؤرمه‌ین فضولی، بو وضعیتی شعرلرینه عکس ائتدیرمک‌دن دا چکینممیش‌دیر. فضولی‌نین آنلاددیغینا گؤره، اؤزونه باغ‌لانان بیر میقدار دولانا‌جاق وسایلی داهی اؤدنممیش، بونون اوزرینه فضولی ده قانونی سلطان سلیمانا یازدیغی مکتوب ایله ادبیاتیمیزین ان گؤزل مکتوب نومونه‌لرین‌دن بیری اولان شیکایتنامه آدلی اثری اورتایا چیخارمیش‌دیر. آراشدیرما‌لارا گؤره، فضولی آیریجا شاهزاده بایازید ایله اوزون مدت مکتوپلاشمیش، بو مکتوبلاشما بیر دؤور کسیلیب سونرا یئنی‌دن داوام ائتمیش‌دیر.
فضولی، متصوّف بیر شاعردیر. شعرلری‌نین اساس موضوعسونو عشق و قوووشما حسرتی تشکل ائدیر. عشق موضوعسوندا یازدیغی غزل‌لر، اونون عمومی تورک ادبیاتی‌نین ان بؤیوک غزل شاعری اولا‌راق تانینماسینا سبب اولموش‌دور. تورک، فارس و عرب دیل‌لرینده شعر دیوان‌لار اولان فضولی، عینی زاماندا شرقین شکسپیری اولا‌راق دا شؤهرت قازانمیش‌دیر.
فضولی، بیر عرب حکایه‌سی اولان و داها اوّل عرب و فارس دیل‌لرینده یازیلمیش اولان لیلی و مجنون حکایه‌سینی اصلین‌دن داها گؤزل و داها دویغولو بیر شکیلده تورکجه قلمه آلمیش‌دیر. فضولی‌نین لیلی و مجنونو تورک ادبیاتین‌داکی ان اهمیت‌لی لیریک اثرلردن بیری اولا‌راق قبول ائدیلمکده‌دیر. شاعر اثرین ایلک بؤلوملرینده اورکده آچدیغی درین کدر حالینی، عاشیق‌لارین بیر-بیرلرینه چاتما ایستگینی، عشق اوغرونا ائدیلن مباریزه‌نی و توتقونو دیله گتیرمیش‌دیر.
فضولی‌نین دیلی اورتاق اوغوز تورکجه‌سی‌دیر. لاکین آذربایجان تورکجه‌سینه یاخین‌لیغی و بنزرلیگی سببیله، آذربایجان تورکجه‌سی اولا‌راق تعیین اولونماقدا‌دیر. بونا گؤره ده هم تورکیه ادبیاتی، هم ده آذربایجان ادبیاتی تاریخینده فضولی‌نین خصوصی بیر یئری واردیر.
----------
شاعر، اوّل‌لر بیر نئچه گؤزل معنا‌لی تخللوصو سئچدیک‌دن سونرا، بو مخلص‌لرین دیگر شاعرلر طرفین‌دن ده ایستیفاده ائدیلدیغی و یا ایستیفاده ائدیله‌‌بیله‌جگی دوشونه‌رک، فضولی تخللوصونو آلمیش‌دیر. چوخ و گرک‌سیز معناسینی وئرن فضولی سؤزجوگونون باشقا‌لاری طرفین‌دن ایستیفاده ائدیلمیه‌جگینی، فضولی دیوانیندا بئله آچیقلاییر : " شعره باشلارکن گون‌لرله بیر تخللوصو آلماق یولوندا دوشوندوم. سئچدیگیم تخللوص بیر مدت سونرا بیر اورتاق چیخدیغی اوچون یئنی بیر تخللوصو آلیردیم. نهایت من‌دن اوّل گلن شاعرلرین عباره‌لری دئییل مخلصلری قاپیشدیق‌لارینی آنلادیم. قاریشیق‌لیغی اورتا‌دان قال‌دیرماق اوچون فضولی تخللوصونو سئچدیم. "
فضولی‌نین تورکجه دیوانی، اونون شاعرلیک قابیلیتینی اورتایا قویان ان اهمیت‌لی اثری‌دیر. بو اثرده اله آلینان سئوگی موضوعلو غزلّر تورک ادبیاتی‌نین ان گؤرکم‌لی لیریک شعر نومونه‌لرین‌دن‌دیر. شاعری بو قدر باشاریلی و قالیجی قیلان دا اونون بو شعرلرین‌دکی لیریزمی اسکیک‌سیز بیر آنلاتیملا سوسله‌مسی‌دیر . دیوانین باشقا بیر خصوصیتی ده، اثرین باشیندا اولان اؤن سؤز حیسه‌سی‌دیر. بو حیسه‌ده شاعر ؛ گئرچک بیر شاعرین خصوصیت‌لرینی، شعرده اوسلوبون نئجه ایشلنمه‌سی لازیم اولدوغونو، علم و شعر علاقه‌سینی، شاعر طبیعتی‌نین شعره عکس اولونما‌لارینی، کلاسیک شعرین دگر محاکیمه‌لرینی، شعر صنعتی‌نین ریتوریک و رومانتیک باغلامینی، شعرده خصوصی‌لیگی نئجه یاخالاناجاغینی، دؤورون شعر آنلاییشینی و اؤزونه تخللوص ائتمه‌نین حکایه‌سینی اوخوجوسو ایله پایلاشمیشدیر.

آردینی اوخو
پنجشنبه 16 بهمن 1393

شهریار

0 گؤروش
یازار:‌ سمیرا



 اؤزو حیاتدایکن بئله، دونیادا اون قازانان‌، اثرلری بیر چوخ دیله چئوریله‌رک یاییملانان شهریار، چاغداشی اولان باشقا شاعرلردن بعضی فرق‌لی اؤزللیک‌لره صاحب‌دیر. شهریارین ان اؤنم‌لی اؤزللیگی، اونون کلاسیک ادبیات‌دان معاصر ادبیاتا گئچیش پروسسی‌نین نماینده‌سی اولماسی‌دیر. او، بیر طرف‌دن حیات طرزی‌، قوللاندیغی شعیر نؤوع و اوسلوبو باخیمین‌دان کلاسیک شاعرلری چاغریشدیریرکن، اؤته یان‌دان دا معاصر ادبیاتین احتیاج‌لارینی شعیرلرینه عکس ائتدیره‌رک، گونوموز شعری‌نین ان گؤزل نومونه‌لرینی وئرمه‌یی ده باجارمیش‌دیر. شهریار هر شئی‌دن اؤنجه بیر عشق شاعری‌دیر. اینسانی عشق و ایلاهی عشق اونون شعرلری‌نین اساس قونوسونو تشکیل ائدیر. خوش‌گؤرو‌، باریش، عدالت، اینسان‌لار آراسیندا سئوگییه دایالی بیر آنلاییش شهریار شعری‌نین دقته چارپان اؤزللیک‌لرین‌دن‌دیر .

آدی محمد حسین بهجت تبریزی اولان شهریار، 1906-دا تبریزده دوغولدو. آتاسی میر‌آغا خوشکنابی دؤورونون سایقین شخص‌لرین‌دن و وکیل ایدی. شهریار اوشاق‌لیق ایللرینی آتاسی‌نین کندی خوشکنابدا، "حیدر بابا" داغی‌نین اتک‌لرینده گئچیرمیشدی. اورادا گئچیردیگی گؤزل گون‌لر و خوش خاطره‌لر گ، اونون یادداشیندا ائله ایز بوراخمیشدی کی گ، ایللر سونرا قلمه آلدیغی "‌حیدر بابایا سلام‌" شعری‌نین قونوسونو اوندان آلا‌جاقدی.

شهریار ایلک و اورتا ائییتیمینی تبریزده تاماملادی. آنا دیلی اولان تورکجه‌نین یانیندا فارس، عرب و فران‌سیز دیلینی ده چوخ یاخشی اؤیرنن شهریار، داها سونرا تحصیلی‌نین داوامی اوچون تهران دارالفونونونا گئدیب اورادا طب ائییتیمینه باشلادی. اؤیرنجیلیک ایللرینده شاعرلیک قابیلیتینی دفعه‌لرله سینایان و اطرافین‌داکی‌لارین تشویقی ایله قارشی‌لاشان گنج شهریار، هر گئچن گون طبدن اوزاق‌لاشا‌راق ادبیات عالمینه یاخین‌لاشیردی. هر کسی شاشیردا‌جاق درجه‌ده گؤزل شعیرلر یازان گنج شهریار، یاشادیغی عشق آجی‌سینا دؤزه‌بیلمه‌یینجه، تحصیلینی یاریم بوراخا‌راق یالنیزلیغا چئکیلدی. بو اولای تمیز و معصوم بیر عشق آرخاسین‌دان گئدن گنج شهریارین حیاتیندا درین بیر ایز بوراخدی. چونکو عاشیق اولدوغو قیزین آتاسی، قیزینی پاراسی پولو اولمایان بیر شاعره وئرمک‌دنسه، شاه سارایینا منسوب بیر آلبایلا ائولندیرمه‌یی سئچمیشدی. اوسته‌لیک شهریار سارای‌لی‌لار طرفین‌دن باشقا بیر شهره سورگون ائدیلمیشدی. شهریاری بیر شاعر اولا‌راق شهریار ائدن بو اولسا گرک. چونکو او تاریخ‌دن سونرا شهریارین شعیرلری گئرچک بیر عشقی و گئرچک بیر عشق آجی‌سینی عکس ائتدیرمه‌یه باشلامیشدی.

شهریار گئچیمینی تامین ائتمک اوچون اؤنجه سورگون ائدیلدیگی مشهد شهرینده اسناد مودورلوگونده، داها سونرا تهرانا دؤنه‌رک تاریم بانکیندا ایشه باشلادی. آنجاق هئچ بیر زامان شعیردن اوزاقلاشمادی .

سئوگی‌لی‌سینی ایتیرن، آنجاق سئوگی‌سینی و عاشیقلیق روحونو ایتیرمه‌ین شهریار، ایللر سونرا دایی‌سی‌نین قیزی عزیزه خانیملا ائولندی و اوچ اوشاق صاحبی اولدو.

اؤنجه‌دن "‌بهجت‌" تخلوصونو ایستیفاده ائدن و داها سونرا "‌شهریار‌" تخلوصونو سئچن شاعرین ایلک شعری 13 یاشیندایکن ادب درگیسینده یاییملاندی. تهرانا گئتدیک‌دن سونرا مشهور موسیقیچی ابولحسن صبا ایله تانیشان شهریار، اونون یانیندا موسیقی ائییتیمی آلماغا، اؤزللیکله ده "‌سه‌تار‌" اولا‌راق بیلینن بیر آلتی اؤیرنمه باشلادی. بو ایللرده شهریار یازدیغی فارسجا شعیرلرله بؤیوک شؤهرت قازانمیشدی. تئز تئز ادبیات و مدنیت شؤلنلرینه چاغیریلا‌راق شعیرلر سؤیله‌ین شاعر، "‌حافظ ثانی"، یعنی "ایکینجی حافظ" کیمی تقدیم ائدیلیردی. آنجاق بیر گون آناسی شهریارا بئله دئیر: "اوغلوم، هر کس سن‌دن بحث ائدیر. بؤیوک بیر شاعر اولدوغونو سؤیله‌ییرلر. اما من شعیرلرین‌دن هئچ بیر شئی آنلامیرام . بیر آز دا اؤز آنا دیلینده یاز کی، من ده آنلاییم‌‌‌" بو سؤزلر شهریاری چوخ ائتکیلر، آناسی‌نین حاق‌لی اولدوغونو آنلار و خیال عالمینده اوشاق‌لیق خاطره‌لرینی بیر دفعه داها گؤزدن گئچیریر. داها سونرا او خاطره‌لری آنا دیلی اولان تورکجه‌ده یازماغا قرار وئرر. شهریارین 1950-1951 ایللرینده یازدیغی و "‌حیدر بابایا سلام‌" آدلاندیردیغی مشهور اثری، بو حادثه‌نین نتیجه‌سینده اورتایا چیخمیش‌دیر. شهریار، خالقین دیلینده، ساده بیر اوسلوبلا و هئجا وزنینده قلمه آلدیغی بو اثرین، اونون شاه اثری اولاجاغینی و قیسا بیر مدت ایچینده دونیانین بیر چوخ دیلینه چئوریله‌جگینی تخمین بئله ائتمیردی. "‌هحیدر بابایا سلام‌" شعری، تورکجه‌نین ایراندا قاداغان اولدوغو بیر دؤورده اورتایا چیخدی. آنجاق شهریارین فارسجا شعرلرین‌دن الده ائتدیگی شؤهرت، اونون تورکجه شعری‌نین یاییملانماسینا وسیله اولدو. بو اثرین تأثیری او قدر بؤیوک ایدی کی‌، ایران، آذربایجان، تورکیه و تورک دونیاسی‌نین بیر چوخ بؤلگه‌سینده اونا یوزلرجه نظیره یازیلدی. اثرین ادبی و دیلسل اؤزللیک‌لری بیلیم آدام‌لاری طرفین‌دن آراشدیریلدی. تورکیه‌ده مشهور تورکولوگ مرحوم پروفسور دکتر محرم ارگینین، اثرین دیل اؤزللیکلریله ایلگیلی حاضیرلادیغی کیتاب، هله اونیورسیته‌لرین تورکولوژی بؤلوم‌لرینده اؤنم‌لی بیر قایناق اولا‌راق ایستیفاده ائدیلمکده‌دیر.

بوتون بو شؤهرت و موفقیته باخمایا‌راق، شهریار هئچ بیر زامان مادیات و یا مقام آرخاسیندا اولمادی . ساده و نورمال بیر حیات طرزینی سئچدی و نهایت 1988ده حیاتا گؤزلرینی یومدو و مؤحتشم بیر جنازه تؤرنی ایله تبریزین "‌‌شاعرلر مقبره‌سی‌" قبیریستانلیغیندا تورپاغا وئریلدی.

آردینی اوخو
پنجشنبه 16 بهمن 1393

مو‌لانا جلال الدین محمد رومی

0 گؤروش
یازار:‌ سمیرا



مولانا حضرت‌لری، درین فلسفه‌سی، اینسانلیغا قارشی خوشگؤروشو و یول گؤستریجی سؤزلریله مشهوردور

ائله بؤیوک اینسان‌لار وار کی، شؤهرتی دونیانین هر طرفینه یاییلیب آدی چوخ اینسان طرفین‌دن دویولماسینا باخمایا‌راق، هله آراشدیرما موضوعسو اولا‌راق علم اینسان‌لاری‌نین ماراق مرکزینده. بو بؤیوک اینسان‌لاردان بیری ده هامیمیزین چوخ یاخشی بیلدیگی لاکین چوخ یاخشی تانیمادیغیمیز مو‌لانا جلال الدین محمد رومی‌نین. مولانا حضرت‌لری، درین فلسفه‌سی، اینسانلیغا قارشی خوشگؤروشو و یول گؤستریجی سؤزلریله مشهوردور. او هر شئی‌دن اوّل بیر شاعردیر. حیکمت‌لی سؤزلرینی شعر دیلیله همصحبت‌لرینه چاتدیرمیش‌دیر. حیاتینی علم و تصوّفه حصر ائدن مو‌لانا، عینی زاماندا بیر عاشیق‌دیر. چونکی عشق و سئوگی، اونون دئمک ایستدیگی هر شئیین اؤزونو میدانا گتیریر. مو‌لانایا گؤره اللها چاتماق اوچون لازیم‌لی اولان ان اهمیت‌لی شئی عشق‌دیر. مو‌لانا ائورنسل بیر سئوگییه اینانار. اونون فلسفه‌سینده عیرق، دین، دیل آیری-سئچکی‌لیگی یوخدور. مو‌لانا'یا گؤره اصل مسئله اینسان ایدی و دین‌لر، فلسفه‌لر و اخلاق سیستم‌لری اینسانی داها خوشبخت، داها قیمت‌لی ائتمه یولون‌داکی واسیطه‌لردی. اونا گؤره بوتون اینسان‌لار، اللهین بیر گؤرونتوسویدو.

-----------------

فیکیرلری یاشادیغی چاغی آشا‌راق گونوموزه قدر چاتان، دونیا سویه‌سینده تانینان متصوّف‌لردن بیری اولان مو‌لانا، 1207-جی ایلده تورکیستان، بو گون افغانیستان مرزلری ایچری‌سینده یئر آلان بلخ شهرینده دوغولموش‌دور. آتاسی بلخ شهری‌نین ایره‌لی گلن‌لرین‌دن اولوب ساغلیغیندا "عالیم‌لرین سلطانی" عنوانینی آلمیش اولان حسین هاتیب اوغلو بهاءالدین ولدی. آناسی ایسه بئله امری روکنددی‌نین قیزی مؤمنه خاتون‌دور. مو‌لانانین آتاسی دؤورون چتین شرط‌لری گره‌گی 1212-جی ایلده بلخ‌دن آیریلا‌راق عا‌یله‌سیله بیرلیکده خوراسانین نیشابور شهرینه گئتمیش، اورادا دؤورون تانینمیش شاعر و متصوف عطار نیشابوری ایله قارشیلاشمیش‌دیر. بو قارشیلاشما داها کیچیک یاش‌لاردا اولان مو‌لانا اوچون اهمیت‌لی بیر آنی اولموشدو. چونکی عطار، قیسا گؤروشده مو‌لانانی تقدیر ائتمیش‌دیر.

مو‌لانانین آتاسی داها سونرا نیشابور‌دان بغدادا، آردین‌دان دا کعبه‌یه حرکت ائتمیش، حج زیارتینی یئرینه یئتیردیک‌دن سونرا دؤنوشده اوّل شاما، سونرا ایسه مالاتیا، ارزینجان، سیواس، کایسئری، نیغده یولو ایله کارامانا گلمیش، اورادا سوباشی امر موسانین تیکدیردیگی مدر‌سه‌‌یه یئرلشمیش‌دیر. مو‌لانا 1225-جی ایلده شرف الدین لالا-‌نین قیزی گئوهر خاتون ایله کاراماندا ائولنمیش‌دیر. سلطان ولد و علاءالدین چلبی بو ائولیلیگین اوشاق‌لاری‌دیر. ایللر سونرا گئوهر خاتونون وفاتی‌نین آردین‌دان مو‌لانا بیر اوشاق‌لی دول اولان کررا خاتون ایله ایکینجی ائولیلیگینی ائتمیش و بو ائولیلیک‌دن ده مظفرالدین و امیر عالیم چلبی آدلی ایکی اوغلو و ملیکه خاتون آدلی بیر قیزی دونیایا گلمیش‌دیر.

مو‌لانانین یاشادیغی بو ایللر، سلجوق‌لو دولتی‌نین حاکم اولدوغو دؤور ایدی.قونیه/ کونیا سلجوق‌لولارین باشکندی و اهمیت‌لی بیر علم و صنعت مرکزی ساییلیردی. سلجوق‌لو سلطان‌لاری دؤورون بؤیوک عالیم و صنعتچی‌لرینی کونیایا ییغا‌راق دولتین گوجونو اینکیشاف ائتدیرمه‌یه چالیشیردی‌لار. بو سببله ده سلجوق‌لو حؤکمداری علاءالدین کیقباد، مو‌لانانین آتا بهاالدین ولدی کونیایا دعوت ائده‌رک اورادا یئرلشمه‌سینی ایسته‌دی. 1228-جی ایلده عائله‌سی ایله بیرلیکده کونیایا گئدن و اورادا یئرلشن بهاالدین ولد، اصلینده بو شهرین اوغلو مو‌لانانین گلیشمه‌سینده داها فایدا‌لی اولاجاغینی بیلیردی. نئجه کی ائله ده اولدو.

------------

مو‌لانا حیاتینی خالقا خیدمت ائتمک، اینسان‌لارا قارشی‌لیق‌سیز سئوگی گؤسترمگی اؤیرتمکله کئچردی. لاکین اونون حیاتیندا دؤنوش نقطه‌سی ساییلا بیله‌جک حادثه‌لر واردی. بون‌لاردان بیری بلکه ده ان اهمیت‌لی‌سی مو‌لانانین شمس تبریزی ایله تانیشماسی ایدی. بو تانیش اولما شمس تبریزی‌نین بیر سوالی ایله باشلاییر و درین بیر دوستلوغا چئوریلیر. مو‌لانا، جدی بیر شکیلده شمس‌ین تأثیری آلتیندا قالار و دونیایا دونیاگؤروشو دگیشیر. شمس مو‌لانانی تأثیر، مو‌لانا ایسه بوتون دونیانی. اما چوخ تأسف کی، اطراف‌داکی قیسقانج‌لیق‌لار شمس تبریزی‌نین چوخ ناراحات ائدیر و اورا‌دان اوزاق‌لاشماق مجبوریتینده قالار. مو‌لانا، شمسی چوخ آختارار. اونون آیریلیغییلا، کؤنول‌لری یاخان، سیزلا‌دان، نیجه شعرلر سؤیله‌یر. اونو آختارماق اوچون ایکی دفعه شاما گئدیر. لاکین اونو تاپا‌بیلمز. مو‌لانا اونو جیسمن تاپا‌بیلمز، اما معنا جهت‌دن اونو اؤزونده تاپار. آی کیمی اؤز وارلیغیندا میدانا چیخان شمسین، اؤزونده گؤرر و دئیر کی: "جیسمن اوندان آیریییم اما، بدن‌سیز و جان‌سیز ایکیمیز ده بیر نوروز. ای آختاران کیشی! ایستر اونو گؤر، ایستر منی. من اویام او دا من. "

حیاتینی "خامدیم، پیشدیم، یاندیم" سؤزلری ایله یئکون‌لاش‌دیران مو‌لانا 17 دسامبر 1273 بازار گونو حاقین رحمتینه قوووشدو.

بو گون مو‌لانا جیسمن یانیمیزدا اولماسا دا، روحن بیزیمله‌دیر. اونون بیزه بوراخدیغی معنوی میراث، ائورنسل دگرلره صاحب اولدوغو اوچون، بوتون اینسان‌لارا بوراخیلان بیر حیات درسی‌دیر. بلکه ده مو‌لانانین بیزه آشیلاماغا چالیشدیغی تولئرانس‌لیق، عشق و قارشی‌لیق‌سیز سئوگی، ساواش‌لار و پیس‌لیک‌لر ایچینده بوغولان دونیانین قورتولوشو اوچون تک چاره‌دیر.

بیر نمونه مولوی نین تورکجه شعرلریندن :

اوسون وارسا ای غافل،

آلدانماغیل زنهار مالا.

شول نسنه‌یه‌که سن قویوب،

گئده‌رسن اول گئرو قالا.

سن زحمتینی گؤره‌سن،

دوره‌سن دونیا مالینی.

آنلار قالیرلار خرج ائدوپ،

آنمیالار زهی بلا.

سنی اونودور دوستلارین،

اوغلون، قیزین، عورتلرین.

اول مالینی أوله شلر،

حساب ائدوپ قیلدان قیلا.

قیلمایالار سنه وفا،

بونلار بای اولا، سن گدا.

سنین ایچون وئر‌میه‌لر،

بیر پارا ائتمک یوقسولا.

بیر دملیغا آغلاشالار،

آندان واروپ باغلاشالار.

سنی چوقورا گؤموشوب،

تئز دؤنه‌لر گوله – گوله.

اولکیم گئده اوزاق یولا،

گرک آزیق آلا بیله.

آلمازوسا، یولدا قالا،

ارمیه هرگز منزله.

وئردی سنه مالی چلب،

تا خیره قیلاسان سبب،

خیر ائیله‌ده قیل حق طلب،

وئرمه‌دن اول مالین یئله.

بو گون سئوینیرسن منیم،

آلتونوم آقچام چوق دئیو.

آنمازموسان اول سونوکیم

محتاج اولاسان بیر پولا.

اس أتمیه مالین سنین،

خوش اولمیا حالین سنین.

نسنه أرمیه ألین سنین،

گر سونمادونسا أل – اله.

اول مال دئدین، مار اولا،

حقا که گورون دار اولا.

هرگز مدد بولمایاسون،

چئوره باقوب ساغا – سولا.

آلتون‌ایسه آندا چوراق،

اولا سنه اول خوش طوراق.

نئیلر طایم قیلدین یاراق،

آنلارسنه قارشو گله.

مال سرمایه قیلغیل آزیق،

حققه اینانیرسان باییق،

یاپ آخرت، دونیانی ییق،

تا ایره‌سون سون منزله.

چون اولا الونده درم،

گوج ‌یئتدوکجه قیلغیل کرم.

اؤگود بودور که من دئرم

دولت آنین اؤگود اولا.

ائتمه مالین الا تلف،

حق بیرمینه وئرور خلف.

قیلغیل سلف، قیلما علف،

ورنه قامو ضایع اولا.

دیلر ایسه‌ن عیش ابد،

توتغیل نه دئدیسه احد.

آندان دیله هر دم مدد،

تا ایری‌شه سون حاصله.

بؤیله بویوردو لم‌یزل،

بیلین بونو، قیلین عمل:

ترک ائیله‌نوز طول أمل،

اویمانیز هر بیر باطله.

یوخسول ایسه‌ن صبر ائیله‌غیل،

گر بای ایسه‌ن ذکر ائیله‌غیل.

هر بیر حالا شکر ائیله‌غیل،

حق دؤندورور حالدان حاله.

دونیا اونون آخرت اونون،

نعمت اونون، محنت اونون،

تامو اونون، جنت اونون،

دولت اونون قانی بولا؟

حققا منه نه مال گرک،

نه قیل گرک، نه قال گرک،

دیله‌گوم ائیو حال گرک،

کندوزونو بیلن قولا.

من بیر بیجان ای الاه،

یاولاق چوخ ائیله‌دوم گناه.

یازوقلارومدان آه، آه،

نه شرح ائدوم، گلمز دیله.

ای شمس دیله حاقدان حقی،

بیز فانی ییز، اولدور باقی.

قامولار اونو مشتاقی،

تا خود کو کیمین اولا ؟

آردینی اوخو
پنجشنبه 16 بهمن 1393

عمادالدین نسیمی

0 گؤروش
یازار:‌ سمیرا




دونیادا ایز بوراخان تورک بؤیوک‌ لری(عمادالدین نسیمی)

نسیمی آذربایجان ساحه‌سینده اسکی اوغوز تورکجه‌سی شعر دیوانی یازان ایلک شاعر کیمی تانینیر

آذربایجان، آنادولو، ایران، عراق، سوریه ساحه‌لری باشدا اولماقلا تورک دونیاسی‌نین بؤیوک بیر قیسیمینده درین تأثیر بوراخان، اثرلریله تورک تصووف ادبیاتیندا اؤزونه خاص بیر جیغیر آچان شخصیت‌لردن بیری ده عمادالدین نسیمی‌‌دیر.
نسیمی، 14. عصرده یاشامیش‌دیر. آذربایجان ساحه‌سینده اسکی اوغوز تورکجه‌سی شعر دیوانی یازان ایلک شاعر کیمی تانینیر. فارسجا و عربجه ده دیوان‌لار اولان نسیمی‌نین عرب دیوانی الیمیزه چاتمامیش‌دیر. لاکین ایکی دیلده یازدیغی شعرلرین‌دن عربجه‌یه ده واقف اولدوغو گؤرولمکده‌دیر.
نسیمی‌نین دوغوم یئری و تاریخی حاقیندا قطعی معلومات یوخ‌دور. لاکین 1369-1370 ایللرینده، آذربایجانین شاماخی شهرینده دوغولدوغو اولاسی‌دیر. عراق تورک آراشدیرماچی‌لاری، نسیمی‌نین بغداد یاخینلیغیندا دوغولدوغونو، عراق تورکمن شعری‌نین قوروجوسو اولدوغونو ایفاده ائدرلر. نسیمی‌نین گئرچک آدی علی‌دیر. آتاسی سید محمد دؤورونون تانینمیش بیری ایدی. نسیمی، "سید"، حسینی "و" نسیمی "مخلصلرییلا شعرلر یازمیش‌دیر.
-----------
آراشدیرماچی‌لارا گؤره، نسیمی ایلک تحصیلینی شاماخیدا تاماملامیش‌دیر. کیچیک یاشلاریندان‌ بری شعره و فلسفه‌یه ماراق گؤسترن نسیمی، اؤزون‌دن اوّلکی بؤیوک شاعرلرین اثرلرینی اوخوموش، اونلاری قاوراماغا چالیشمیش‌دیر. نسیمی ان چوخ 10-جو عصرده بغداددا اعدام ائدیلن حلاج منصورون طریقتینی بئینمیشدی.
نسیمی‌نین یاشادیغی دؤور، امیر تیمورون بؤلگه‌نی اله کئچیرمه‌یه چالیشدیغی دؤوردور. بو دؤورده آذربایجاندا میرانشاه حاکمیتی سوروردو. "حروفی‌لیک" تریقتی ده تام بو دؤورده یاییلماغا باشلادی و نسیمی ده عایله‌سیله بیرلیکده بو طریقتی منیمسه‌دی. حروفی‌لیک طریقتی‌نین قوروجوسو تبریزلی فضل الله نیمی ایله شیرواندا یاخین‌دان گؤروشن نسیمی، اوّل اونون اؤغرنجیسی و داها سونرا دا اونون ان اهمیت‌لی داوامچی‌سی و خلیفه‌سی اولدو. لاکین فضل الله نیمی، امیر تیمورون اوغلو میرانشاه طرفین‌دن توتولا‌راق علینجه قالاسی یانیندا فجیع بیر شکیلده اؤلدورولدوق‌دن سونرا، آذربایجان‌دان آنادولویا گئتدی. آنادولودا اولدوغو مدتجه حروفی‌لیگی یایماغا چالیشان نسیمی، اورا‌دان دا حلبه گئتمک مجبوریتینده قالدی. بوتون حروفی‌لر کیمی هر یئرده تعقیب ائدیلن نسیمی، نهایت 1417-جی ایلده حلبده دریسی سویولاراق اؤلدورولدو.
-------
نسیمی، ایدئالیست بیر شاعر ایدی. اسکی اوغوز تورکجه‌سی، خصوصیله آذربایجان ادبیاتیندا یازیلمیش اولان ایلک فلسفی شعرلر اونا عاییددیر. چاغی‌نین مشهور اولان ایدئولوژیسینه قارشی چیخان نسیمی، قوران کریم‌دن ایلهام آلا‌راق، اینسانی حاقین یئر اوزون‌دکی محضری کیمی گؤرور و شعرلرینده بو فیکری مدافعه ائدیردی. نسیمی، پانتئیزم و یا "وحدت وجودا" اینانیردی. اونا گؤره، جیسیم و روح بیر بوتون‌دور. کامیل اینسانا حؤرمت ائدیلمه‌لی و اینسان، عقلی و معنوی دگرلرینه صاحب چیخما‌لی‌دیر.
نسیمی، بوتون باسقی‌لرا باخمایا‌راق یاخین و اورتا شرق اؤلکه‌لرینی تأثیر باشارمیش‌دیر. اونون بؤلگه اؤلکه‌لری‌نین شعرینده گتیردیگی یئنی‌لیک، عصرلر سونرا یازیلمیش اولان شعرلرده ده گؤرونمکده‌دیر. حبیبی، فضولی، ختای و قوسی کیمی شاعرلر اوزرین‌دکی تأثیری، آنادولو بکتاشی‌لرین آراسین‌داکی اهمیت‌لی یئری، هر کس طرفین‌دن بیلینمکده‌دیر.
شاعر، شعرلرینده جاهیل اینسان‌لاری تنقید ائدیر، حیاتین گؤزل‌لیک‌لرین‌دن ایلهام آلماغا چاغیریر. اونون لیریک عاشیقانه شعرلری، طبیعتی تصویر ائدن غزل‌لری، اوخوجونون گوزللیک ذوقونو اوخشایار. نسیمی عینی زاماندا حاکم طبقه‌نین ظلم و عدالت‌سیزلیگینی، ایستیلاجی‌لارین اوغرولوقلارینی، اونلارا خیدمت ائدن اینسان‌لارین خیانتینی گؤسترن اثرلر ده یازمیش‌دیر. بؤیوک سؤز اوستاسی اولان شاعرین اثرلری ادبی یؤن‌دن بؤیوک بیر صنعت‌کارلیقلا ایشلنمیش، استئتیک دگری یوکسک بیر اوصلوبلا قلمه آلینمیش‌دیر.
نسیمی‌نین صنعتی اینسان گؤزل‌لیگینه، اینسان گوجونه حیران‌لیقلا دولو بیر مارش کیمی‌دیر. لاکین بو گؤزل‌لیک، بو گوج دونیا‌داکی بوتون اینسان‌لارا دئییل، یالنیز اؤزونو تانیمیش، آنلامیش کامیل اینسان‌لارا خاص‌دیر.
عمادالدین نسیمی‌نین آنا‌دان اولماسی‌نین 600. ایلدؤنومو یونسکونون لیدرلیگینده بؤیوک مراسیم‌لرله دونیانین بیر چوخ یئرینده قوتلانمیشدی. اونون تورکجه شعر دیوانی سووئت‌لر دؤورونده آذربایجاندا عرب حرفلریله نشر اولونموش، اونونلا علاقه‌دار اونلارلا علمی فعالیت ائدیلمیش‌دیر. آذربایجان جمهوریتی‌نین ان اهمیت‌لی دیل تشکیلاتی اولان "دیلچی‌لیک انستیتوسو"، نسیمی آدینی داشیییر. آیریجا نسیمی‌نین حیاتی، فیلمی فیلمی اولا‌راق دا ایللر اوّل ائدیلمیش‌دیر.
تورکیه‌ده ده نسیم ایله باغلی یوکسک لیسانس و دوکتورا تزلریله بیرلیکده، علمی سمپوزیوم‌لار و علمی کیتاب و مقاله‌لر نشر اولونموشدور.

آردینی اوخو
پنجشنبه 16 بهمن 1393
ابزار نمایشگر آی پی